Ака уйăхĕн 27-мĕшĕнче, Чăваш Республикин вĕренÿ тата çамрăксен политикин министерствипе Чăваш Республикин вĕренÿ институчĕн Наци вĕренĕвĕн центрĕ Аслă Вĕрентекенĕмĕр Иван Яковлевич Яковлев çуралнăранпа 170 çул çитнине тата Чăваш чĕлхи кунне халалланă «Туслăх хĕлхемĕ» / «Искорка дружбы»/ республика  шайĕнчи фестивале ирттерчĕ.  

Фестивалĕн республика тапхăрне районта, хулара малти вырăна тухнă ачасем пуçтарăнчĕç. «Сăмах илемĕ», «Чăваш вăййи», «Янра, чăваш юрри», «Чăваш ташши», «Чăваш апачĕ» номинацисенче 400 ачана яхăн тупăшрĕç.

Çак  фестивале Москакасси шкулěнче 2-мӗш класра вӗренекен Мостова Полина  хутшăнчӗ.   Вăл чăваш апачӗ – чăкăт çинчен, хăй мӗнле чăкăт пӗçерни çинчен каласа пачӗ. Чăкăт çинчен ăсталанă такмаксемпе пурне те тӗлӗнтерчӗ. Жюри членӗсем Полинăн ӗçне пысăка хурса хакларӗç. Полина хăй номинацинче призёр пулса тăчӗ . Полинăна саламлатпăр, малашне те ăнăçусем сунатпăр.