Ака уйăхěн 3-мěшěнче Муркаш районěнчи Çатракассинчи вăтам шкулта «Туслăх хěлхемě-2018» фестиваль иртрě. Кунта капăр тум тумланнă  шкул ачисем хaйсен тавракурăмěпе юрра-ташша ăста пулнине кăтартма пуçтарăнчěç.  Шкул ачисем чăваш чĕлхине лайăх пĕлнине те, тавçăруллă пулнине тĕрлĕ станцисем витĕр тухса кăтартрĕç. Ку фестивальте Москакасси шкулěнчен 2 «а» класра вěренекен Полина Мостова  та хутшăнчě. Вăл чăваш апачě – чăкăт çинчен каласа кăтартрě. Полина чăвашсем ěлěкрен мěнле апат-çимěç çинине тěпчесе пěлнě. Хальхи чăвашсен пирěн мăн асаттесем çинě апат-çимěçрен нумайăшě паянхи кун та пирěн сěтел çинче. Çавна кура Полина хăй те конкурса хатěрленнě хушăра чăкăт пěçерме вěренчě, жюри членěсем умне пукане пек чăваш çи-пуçěпе тухса пурне те чăкăтпа сăйларě.  Полина ěçне жюри членěсем пысăка хурса хакларěç, вăл «Туслăх хěлхемě-2018» фестивальте 1-мěш вырăн çěнсе илме пултарчě (ертÿçи Желтова Светлана Федоровна). Полинăна саламлатпăр, малашне те ăнăçусем кăна сунатпăр. Мěн ěмěтленнисем яланах пурнăçланса пыччăр. Маттур!