Тăван çĕр-шыва юратасси, ăна хÿтĕлеме хатĕрленесси мĕн ачаран пуçланать, кулленхи ĕçре пулса пырать. Паттăрлăхпа хăюлăх, спортпа туслă пуласси пирки ачасене шкулта тĕрлĕ мероприятисем  ирттерсе вĕрентсе пыратпăр. Акă  массăлла оборона тата спорт ĕçĕсен  уйăхлăхĕнче те ачасем кулленех плана кĕртнĕ конкурссене хутшăнса хăйсен ăсталăхне туптарĕç. Морзе азбукине пĕлнинчен пуçласа тем тĕрлĕ тĕвĕсем çыхни, пăшалтан тĕл пени, паттăрлăх юррисем юрлани, сăвăçсен конкурсне хутшăнни таранах тивĕçлĕ  кăтартма  пултарчĕç  хăйсене вĕренекенсем. Çак ĕçре ачасене ертсе пыракан, шкулта ОБЖ  предметне вĕрентекен Иванов Юрий Юрьевичăн тÿпи пысăк. Москакассинчи вăтам шкулта Юрий Юрьевич 1996 çултанпа ĕçлет. Технологи, черчени, ОБЖ урокĕсене ирттернипе пĕрлех «Çамрăк пăшал перекен» кружок ертсе пырать. Унта арçын ачасем кăна  мар, хĕр ачасем те  çÿреççĕ, районта, республикăра иртекен ăмăртусенчен  яланах çĕнтерÿпе таврăнаççĕ. Районта çулсерен иртекен «Зарница» тата «Орленок» вăййисенче те тăрăшуллă педагогăн вĕренекенĕсем  малтисен ретĕнче пыраççĕ.

Юрий Юрьевич çитĕнекен ăрăва патриотла воспитани  парассишĕн тимлет. Çак ĕçе тăван çĕр-шывăн пуласлăхĕшĕн ырми-канми  тăрăшнă хастар çынсене явăçтарать. Нарăс уйăхĕнче шкула  отставкăри подполковник Николай Захарович Краснов тĕл пулăва  килчĕ.  Николай Захарович пирĕн çĕр-шыв ĕмĕрсем хушши пыракан çапăçусенче тăшмана çĕнтерсе паянхи мирлĕ вăхăтра та çынсен лăпкă пурнăçне сыхлани çинчен каларĕ. Тăван çĕр-шывăн чиккисем малашне те шанчăклă хÿтлĕхре пуласси вара çамрăк ăруран килнине çирĕплетрĕ. Çар çынни классем юрă юрласа ретпе утса тухнине хакларĕ, çитменлĕхсемпе лайăх енĕсене палăртрĕ. Çав вăхăтрах шкулта ачасене çакăн пек мероприятисене явăçтарнине ырларĕ. Çамрăксене çар тивĕçĕсене пурнăçлама хăнăхтарни пысăк пĕлтерĕшлĕ пулнине çирĕплетсе каларĕ. Эпир вара çĕр-шыв чиккинче хастар салтаксем тăнă чухне  пирĕн лăпкă ыйхă татăлмасса шанатпăр, мирлĕ пурнăçа аталантарассишĕн тăрăшатпăр.