2015 çул вĕçленсе пырать. Çак çула Раççей Федерацийĕнче Литература çулталăкĕ тата Чăваш Республикинче К.В.Иванов çулталăкĕ тесе йышăннă. Çавна май пирĕн шкулта тĕрлĕрен конкурссем, викторинăсем, литература каçĕсемпе тĕл пулусем иртрĕç. Раштавăн 25 –мĕшĕнче савăнăçлă уявра çулталăк хушшинче ĕçленине пĕтĕмлетме вĕренекенсем, вĕрентекенсем тата хăнасем пуçтарăнчĕç. Малтанах К.В.Иванов пурнăçĕпе пултарулăхне çутатса паракан илемлĕ фильм куртăмăр. Унтан сцена çине пирĕн пĕчĕк туссем, шкул çулне çитичченхи ушкăнри ачасем тухрĕç. «Тилĕпе автан» сценкăна, Вера Степановна Макарова йĕркелесе пынипе, чăн-чăн артистсем пек выляса пачĕç. Сӑмах май каласа хӑварас пулать, «Веселушки» театр ушкӑнне ҫӳрекен ачасем республика шайӗнче иртекен «Хунав» конкурсра 2-мӗш вырӑн йышӑннӑччӗ. Ҫак конкурсра шкул çулне çитичченхи ушкăна ҫӳрекен Тимур Суриков та хутшӑннӑччӗ (воспитателӗ А. В. Парандеева). Халӗ те пӗчӗк Тимур шкул ачисене хӑйӗн пултаруллӑхӗпе савӑнтарчӗ те, тӗлӗнтерчӗ те.
Уява ирттерме 5-9 классенче вĕренекенсем те тĕплĕ хатĕрленсе килчĕç. К.В.Иванов çырнă «Тимĕр тылă» сăвва 5-мĕш класра веренекен Васильева Рада, Воробьева Валя, Парандеев Коля вуласа пачĕç. «Тимурпа унăн команди» пĕччен пурăнакансене кил-тĕрĕшри ĕçсене пурнăçлама пулăшнине 6-мĕш класра вĕренекенсем кăтартрĕç. 7-мĕшсем Константин Ивановăн «Икĕ хĕр» юмахĕнче тĕрĕслĕх шырарĕç. Кун пек уявра, паллах, «Нарспи» поэма чăваш литературинче мĕн тери пысăк вырăн йышăннине асăнмасăр тăма çук. 8-мĕш класра вĕренекенсем шăпах çакна кăтартса пачĕç. Вĕсем «Нарспи» поэмăри Силпи çамрăкĕсен вăйă картине, Нарспипе Сетнер валак умĕнче тĕл пулнине куракансем умне çитерчĕç. Нарспи рольне Антонова Настя тата Сетнер рольне Алексеев Павел вылянине залра ларакансем куç илмесĕр сăнарĕç. Макарова Даша хăйĕн çепĕç сассипе Нарспи юррине шăрантарчĕ. Васильева Карина усал тĕнче тыткăнне лекнĕ Нарспи сăнарне калăпларĕ.
Çакăнтах «Чи лайăх сăвă вулакан « конкурс та иртрĕ. Çак конкурс шкулта нумай çул хушши чăваш чĕлхипе литературине вĕрентнĕ Митта Зинаида Петровна ячĕпе иртрĕ. Зинаида Петровнăн кинĕ Галина Аверьяновна Тимофеева кучченеçсемпех килчĕ, хăйех сăвă вулакансен пултарулăхне те хакларĕ.
Уяв каçне пĕтĕмлетнĕ май, жюри членĕсем çĕнтерÿçĕсене палăртрĕç. Нарспи рольне ăста вылянăшăн Антонова Настя «Чи çепĕç те илемлĕ Нарспи» номинацире çĕнтерчĕ. Макарова Даша «Шăпчăк саслă Нарспи» номинацие тивĕçрĕ. Васильева Карина «Чи туйăмлă Нарспи» пулчĕ. Сетнер рольне калăпланă Алексеев Павел та айккинче юлмарĕ, «Чи хастар Сетнер» номинации çĕнтерÿçи пулса тăчĕ.
Сăвă вулакансен конкурсĕнче 1- мĕш вырăна 5-мĕш класра вĕренекен Иванов Максим тухрĕ, 2-мĕш вырăнта Васильева Рада, Медунгина Карина, Крылов Дима пулчĕç, 3-мĕш вырăна 7-мĕш класри Смелова Катя йышăнчĕ. Çĕнтерÿçĕсене Галина Аверьяновна хисеп хучĕсемпе чысларĕ, чи пысăк та тутлă кукăле вара пулас артистсем тутанчĕç.
К.В.Иванов çулталăкĕ ăнăçлă та тĕрлĕ мероприятисемпе пуян пулчĕ. Константин Иванов хăварнă çутă пирĕн пата нумай теçетке çул иртсен те йăлтăртатса килме пăрахмĕ.